1Ki 14 | NdeIBE | STEP | Ngalesosikhathi u-Abhija indodana kaJerobhowami wagula,

1 Kings 14

Isiphrofetho sika-Ahija Esibi ngoJerobhowami

1 Ngalesosikhathi u-Abhija indodana kaJerobhowami wagula, 2 uJerobhowami wathi kumkakhe, “Hamba, uzifihle ngesinye isimo, ukuze kungabikhona ozakunanzelela ukuthi ungumkaJerobhowami. Ube ususiya eShilo. U-Ahija umphrofethi ukhonale – yena loyana owangitshela ukuthi ngizakuba yinkosi yabantu laba. 3 Uthathe izinkwa ezilitshumi, amakhekhe athile kanye legabha loluju, ube ususiya kuye. Uzakutshela okumele kwenzakale emntwaneni.” 4 Ngakho umkaJerobhowami wenza lokho ayekutshilo wasesiya endlini ka-Ahija eShilo. U-Ahija wayengasaboni, eseyisiphofu ngenxa yokuluphala. 5 Kodwa uJehova wayetshele u-Ahija ukuthi, “UmkaJerobhowami uyeza uzokubuza ngendodana yakhe, iyagula, njalo uzamnika impendulo le lale ngalokhu lalokhuyana. Ekufikeni kwakhe uzakwenza kungathi kayisuye ezifihla.”

6 Kwathi u-Ahija esizwa izisinde zakhe phandle wahle wema emnyango, wathi, “Ngena, Nkosikazi kaJerobhowami, kanti ngokwani ukuzenzisa? Ngithunywe kuwe ngilombiko omubi. 7 Hamba, uyetshela uJerobhowami ukuthi lokhu yikho okutshiwo nguJehova, uNkulunkulu ka-Israyeli, uthi: “Ngakondla wakhula phakathi kwabantu ngakwenza umkhokheli wabantu bami bako-Israyeli.

8 Ngaxebula umbuso endlini kaDavida ngawunika wena, kodwa awuzange wenze njengenceku yami uDavida, yena owagcina imilayo yami njalo wangilandela ngayo yonke inhliziyo yakhe, esenza konke okuhle phambi kwami. 9 Wonile okudlula bonke abakwandulelayo. Usuzidalele abanye onkulunkulu, izithombe ezikhandwe ngensimbi, ungithukuthelisile ngazonda njalo ungifulathele.

10 “ ‘Ngenxa yalokho ngizakwehlisela incithakalo endlini kaJerobhowami. Ngizabhubhisa bonke abangamadoda okucina ekuzalweni kwabaka-Jerobhowami ko-Israyeli – loba yisigqili loba okhululekileyo. Ngizayitshisa indlu kaJerobhowami kungathi ngibase ilongwe, ize iphele du. 11 Izinja zizabadla bonke abakaJerobhowami abafele edolobheni, lezinyoni zemkhathini zizazitika ngalabo abafela emaphandleni. UJehova usekhulumile!’

12 “Wena, buyela ekhaya. Uzakuthi ubeka unyawo lwakho edolobheni umfana ahle afe.

13 U-Israyeli uzalila amngcwabe. Nguye yedwa kwabaka-Jerobhowami ozangcwatshwa, ngoba nguye yedwa endlini kaJerobhowami, uJehova uNkulunkulu ka-Israyeli amfumene enze ukulunga.

14 “UJehova uzazivusela owakhe umbusi ozakuba yinkosi phezu kuka-Israyeli ozachitha abantwana baka-Jerobhowami. Lamuhla yilona lolosuku! Ini? Ye khona manje. 15 UJehova uzamtshaya u-Israyeli, kungathi ngumhlanga uzunguzeka emanzini. Uzamquphuna u-Israyeli elizweni lakhe elihle alinika okhokho bakhe abachithe ngaphetsheya komfula, ngoba uJehova bamvuse ulaka ngokwenza izithombe zika-Ashera. 16 Njalo uzamlahla u-Israyeli ngenxa yezono zikaJerobhowami azenzileyo wakhokhelela lo-Israyeli ukuzenza.”

17 UmkaJerobhowami wasuka lapho waqonda eThiriza. Wathi enyathela egumeni, indodana yafa. 18 Bayingcwaba njalo, u-Israyeli wonke wayililela njengoba uJehova wayetshilo ngenceku yakhe umphrofethi u-Ahija.

19 Ezinye izehlakalo zombuso kaJerobhowami, izimpi lokuthi wabusa njani, kulotshiwe egwaleni lwembali yamakhosi ako-Israyeli.

20 Wabusa okweminyaka engamatshumi amabili lambili wasesiyaphumula labokhokho bakhe ekufeni. Indodana yakhe uNadabi wathatha isikhundla sakhe waba yinkosi.

URehobhowami iNkosi yakoJuda

21 URehobhowami indodana kaSolomoni waba yinkosi wabusa koJuda. Wayeleminyaka engamatshumi amane lanye eqalisa ukubusa, wabusa okweminyaka elitshumi lesikhombisa eJerusalema idolobho elakhethwa nguJehova phakathi kwezizwana zonke zako-Israyeli ukubeka iBizo lakhe. Unina wayenguNahama; engowase-Amoni.

22 AbakoJuda bona phambi kukaJehova. Ngokona lokhu bavusa ubukhwele bolaka lwakhe ukwedlula okwakwenziwe ngoyise.

23 Bazakhela njalo indawo eziphakemeyo zeminikelo, amatshe azilayo lezinsika zika-Ashera ezintabeni zonke langaphansi kwemithunzi yezihlahla eziyizithingithingi.

24 Kwakukhona lapho amadoda alala lamanye amadoda ezindaweni zemihlatshelo phakathi kwelizwe; abantu ababesenza wonke amanyala ezizwe uNkulunkulu ayezixotshile phansi kwabako-Israyeli.

25 Ngomnyaka wesihlanu kaRehobhowami, uShishaki inkosi yaseGibhithe wahlasela iJerusalema. 26 Wabutha yonke inotho yethempeli likaJehova kanye lenotho yesigodlo sobukhosi. Wahuquluza konke kanye lamahawu enziwe ngegolide ayekhandwe nguSolomoni.

27 Ngakho iNkosi uRehobhowami yakhanda amahawu ethusi ukwenanisa lawo yawabela abakhokheli babalindimasango besigodlweni.

28 Kwakusithi nxa inkosi isiya ethempelini likaJehova, abalindi babewathwala amahawu lawo, baphinde bawabuyisele endlini yabalindi.

29 Ezinye izehlakalo ekubuseni kukaRehobhowami, lakho konke akwenzayo, akulotshwanga yini egwaleni lwembali yamakhosi akoJuda? 30 Kwahlala kulempi phakathi kukaRehobhowami loJerobhowami.

31 URehobhowami walala walandela oyise wangcwatshwa labo eMzini kaDavida. Unina wayengu-Nahama, engum-Amoni. U-Abhija indodana yakhe wathatha ubukhosi waba yinkosi.